BOSKOS
EN ALLEGAARTJIES
Wildlife South Africa CC beoog om op hierdie bladsy
vir julle ‘n versameling van Suid Afrikaanse
resepte aan te bied. Dit is keurige kampkos en ander
maklike resepte.
Alhoewel dit meestal op boskos gerig is, kan meeste
van hierdie resepte ook in die kombuis voorberei word.
Dit gaan meestal oor tradisionele veldkos en ander
kampgeregte, wat jy sommer in ‘n japtrap kan
aanmekaarslaan en voorberei. Behalwe resepte van vriende
asook ou familieresepte, hoop ons ook om resepte van
verskillende streke in Suid Afrika in die hande te
kry. Party van hierdie resepte is al baie oud maar
ons wil dit in die hande kry, afstof en hier met julle
deel.
Wat is nou lekkerder as ‘n stil aand, gesellige
kampvuur, ‘n koue biertjie of
glasie wyn byderhand,
goeie vriende en ‘n lekker paar skaaptjops wat
sis op die vuur. In die kole is daar ‘n paar
aartappels in foelie en langsaan twee swart ysterpotjies
met pap en sous daarin. Of wat van ‘n lekker
potjie wat so stadig prut daar op die kole en dan so
net vir die atmosfeer, die gebrul van ‘n leeu
naby die kamp. Of by die see waar ‘n vars elf,
galjoen of snoek oopgevlek op die rooster oor die kole
lê en braai. Dis mos die lewe!
Gebruik hierdie resepte net as ‘n riglyn, dis
al wat dit is en miskien spoor dit jou aan om by te
voeg en te verander nes dit jou pas, solank jy die
voorbereiding geniet en die kos lekker smaaklik is.
Ons nooi julle uit om vir ons julle gunsteling resepte
te stuur, sodat ons dit hier met almal kan deel – kontak
ons.
|
